De Laddshosen sann grod auf `m Sprung. Indn Simmsää vielleicht, wenna ned gfroun is, in de Charts ganz sicha, bei so am subba Album, vielleicht hupf ma aa auf den Zug vo dera neia Voixmuse auf, wern vo irgend am Label gehypt, des no koan boarischn Akt in seine Reihn hod, dann seggds uns demnächst im Fernsehn, am bestn im Musikantnstodl oda in da Abendschau, mied Ledahosn und rosa Hemad deaf ma dann a weng jodln und wenn ma an Text zammgriang, der bläd gnua is, hamma vielleicht sogar an Oktoberfesthit.
Koa Sorge des hamma ned vor, aba dass wos im Gang is, is klar. Mir springan hoid iadz a moi houch und dann seng ma scho wo uns da Wind hidroggd und wo ma dann am Ende landn.
Aba ned nur De Laddshosen, de ganze Welt is „Auf `m Sprung“. Mir sann übaroi und nirgends mehr richtig. Heid hier, moing dort. In oana Minutn in dera, im naxdn Moment scho wieda in na andan Situation. Ins Internet spring ma sowieso olle baar Minutn per Smartphone, Laptop oda sunnsd irgendwia. Egal wos ma machan, mir machan nia nur oa Sach: Mir hean nebenbei Muse, schaun an Film, a Serie, telefoniern, schreim SMS, oda WhatsApp, hauptsach es werd oam ned langweilig. Na, langweilig werds nia, im Gegnteil. Jedn Dog scheint sie de Welt a bissl schneller zu drahn und mir hetzn uns ob, damit ma Schritt hoiddn.
Und oans is klar, wemma zu schnäi wern hauts uns irgendwann aus der Kurvn. Dann hoassds BurnOut, Depressionen oda sunnsd wos und man nimmt Psychopharmaka, de oan wieda zammrichtn, loss ned so weit kemma.
Bevorst irgend a chemischs Gift eischmeisst, leggsd liaba de CD ei. Schnauf moi durch, leg di ins Bett oda sitz di aufs Kanabää, ganz ruhig und heas oh.
Mir wünschn da vui Spaß mied dem Werk, mir hamm uns wirgglich Mühe gehm, oiso sei bitte so nett und respektier des aa!! Wenn da unsa Muse wos Wert is, dann zoi aa dafia und brenns da ned irgendwo. Mir ghean zu koana groußn Plattnfirma, mir hamm de Produktion säim zoid und ehm ummgeh soidads scho, dann kimmd vielleicht moi wieda a Album.
Bis dahin a scheene Zeit!
De Laddshosen
post scriptum: Vielleicht dreff ma uns ja aa moi auf am Konzert...dad uns gfrein...
Den ungekürztn Text, Termine und sunnsd aa vui intressante Sachan find es undda
www.de-laddshosen.de oda auf Facebook „De Laddshosen“
Titelliste
- Konnsd du Boarisch?!?
- De Rua *
- Bussi Schorschi
- Da Roberti
- De Zeiddn endan sie
- Warum vazäisd??
- De neva ending Story vo dir und mir, vo dem wose da song woid und da Natur (A Gschicht)
- Da Fensdastog Dschassddin
- XXL
- LA Beat **
- Ois wose dua is dramma vo Dir
- Da Breiss *
- Bauan Blues
- Danke
- Du bist ned aloa
Text & Musik: Seppe Brem & Martin Wollmann
* Musik: traditionell, Bearbeitung: Seppe Brem & Martin Wollmann
** Musik: Huaba Hartl